Prinsenpaar 2019 “Louverriêk Buchte”

Prinsenpaar 2019 “Louverriêk Buchte”

Prins Han II en Prinses Steffanie regere euver ‘t Louverriek in 2019!

Op zaoterdig 26 jannewari 2019 is Han Pörteners op een boetegeweun spannende meneer oetgerope tot Prins van ’t Louverriêk. Es Prins Han II geit hae same mit zien Prinses Steffanie komend vastelaovessezoen regere euver alle “Louvermenkes en Louverwiefkes”.

Ozze nuje prins is eine gebóare en getóage Louverman. Hae woont in zien awwerlik hoes oppe Dörpsjtraot same mit Prinses Steffanie en hunne hondj Bruno. Ôs prinses is opgegreujd in ’t riek van De Doorzètters, Nirbik. Zèsteen jaor geleje höbbe zie zich lieëre kenne mit awt op nuuj in Buchte bie ‘nne gemeinsjappelikke vrundj. ’t Waor metein ein gróat liefdesvuurwerk wie ze kennis gemaak hèjje dae aovend. Op 20 juni 2015 höbbe ze de leefde bezegeld en zeen ze getrouwd.

Prins Han wirk bie Canon in Gelaen es order begeleider. Es ’t waer ’t ouch maer effe toesjteit, geit hae dao mit de fits haer. Veur de Louvermen verzörg hae dan ouch alle drökwerk, van receptiekaarte tot ’t Louverinfoblaad.

Ozze prinses wirk in ’t dageliks laeve es apothekersassistente bie de Verenigde Apotheken Limburg in Nuth. Nemes van De Louvermen zal dit jaor dus koppien höbbe en ouch es ze zich get sjlap veule haet Prinses Steffanie dao waal ein middelke veur.

In hunne vrieje tied is os prinsepaar erg actief, zeker ouch mit de vastelaovend. Prins Han is vanaaf ‘t 7x 11 jaorig jubileum lid van os vereiniging. Naeve alle drökwerk, zörg hae veur de inwendige minsj mit allerlei culinaire versnaperingen tiejes en nao de versjillende activiteite mit de vastelaovend. Al mieë dan 20 jaor sjpeelt de prins mit in Buchter Revue en om in conditie te blieve voetbalt Prins Han in de zaal bie ZVV Born. Ouch wirk hae gaer in de tuin wo ze ouch nog 2 sjäöpkes höbbe loupe.

Os Prinses is euveral te venje mit de vastelaovend. Of ’t noe de vrouwluujzitting is, ’t awt wieverbal of de optoch, zie zörg altied veur ein sjóane creatie. Thoes bak ze gaer, is aan ’t knutsele of bloomsjikke. Wanjele mit hunne hondj Bruno of urges ein hèpke gaon aete deit ôs prinsepaar ouch erg gaer.

Prins Han II en Prinses Steffanie kent geer, same mit ’t op 1 februwari nog oet te rope jeugprinsepaar, komme felicitere op de prinsereceptie van Karnavalsvereiniging De Louvermen. Daobie kent geer ouch ozze jubilerende sekretaris Wim Maassen en handj komme gaeve mit zien 1 x 11 jaorig jubileum.

Dees receptie vundj plaats op zunjig 10 februwari 2019 vanaaf 11.11 oer in ’t gemeinsjapshoes aan ’t Kirkvonjere in Buchte.

Dit bericht is gepost in Nieuws. Bookmark de link.