Prinsenpaar 2020 “Louverriêk Buchte”

Prinsenpaar 2020 “Louverriêk Buchte”

Prins Tim I en Prinses Inge regere in het nuje decennium euver ‘t Louverriek!

Bielage: officieel statieportret van Prins Tim I en Prinses Inge
(bie gebroek van de foto svp vermelje dat deze is gemaak door Action-foto Born)

 

Op zaoterdig 18 jannewarie 2020 is Tim Meekels op een boetegeweun spectaculaire meneer oetgerope tot Prins van ’t Louverriêk. Es Prins Tim I zal hae same mit zien Prinses Inge komend vastelaovessezoen regere euver alle “Louvermenkes en Louverwiefkes”.

Ozze nuje prins is eine gebóare en getóage Louverman. Hae woont vanaaf 2017 op de Burgemeister Lebensstraot same mit Prinses Inge. Ôs prinses is opgegreujd in ’t Katerriek Houtem. Zie zeen op 13 september 2019 getrouwd nao al bienao 12,5 jaor bie-ein te zeen. Dat naeve de leefde ouch de vastelaovend in ’t hart van os prinsepaar zit, haet Prins Tim al beweze in 1998 ès jeugprins bie De Louvermen en nog ieërder es kleuterprins op de basissjóal.

Prins Tim wirk in Kirchroa bie Boston Scientific. Hae is dao quality engineer. Dit kump good van pas want hae zal dit jaor toe zeen dat de hóage kwaliteit van de vastelaovend in ’t Louverriek weer bereik wurd.

Ozze prinses is op dit moment op zeuk nao wèrk nao gewirk te hubbe bie de gemeinte Zitterd-Gelaen en de gemeinte Beekdaelen. Zie haet de opleiding Sport, gezondheid en management gevolg in Nijmegen.

In hunne vrieje tied is os prinsepaar erg actief, zeker ouch mit de vastelaovend. Prins Tim en Prinses Inge zeen allebei lid van CV De Waeg Kwiet. Deze groep vastelaovesvierders trekke al ein aantal jaor mit in de gróate optoch door ’t Louverriek.

Op kirmesmaonjig is ozze nuje prins ein van de vaste bezeukers aan ’t Hanetoepe in Café De Bar.

Voetbal nump ouch ein prominente plaats in in ’t laeve van ozze prins en prinses. Prinses Inge is besjtuurlid van HBC’09 en maak deil oet van de medische staf van ‘t 1e en 2de elftal. Prins Tim haet zien voetbalsjoon ennige tied geleje aan de wilge gehange en is noe leider bie ‘t 1e elftal.

Naeve dat de nuje prins van ’t Louverriek sportief is, is hae ouch nog muzikaal. Bie zowel ut blaosorkes es de drumband van fanfare St. Jozef oet Buchte besjpeelt hae de bassdrum maer ouch versjillende melodische en anger slaginstrumenten. Hiebie is Tim penningmeister van dees vereiniging. Al die muzikaliteit haet geleid tot ’t Limburgs kampioensjap van de drumband. Op 1 fibbrewarie, dus in ’t vastelaovessezoen, geit ozze prins same mit de drumband ouch nog nao ’t Nederlands kampioensjap. Dus wae wèt, höbbe veer dalik enne prins dae ouch nog Nederlands kampioen is…

Prins Tim I en Prinses Inge kent geer, same mit ’t op 24 jannewarie nog oet te rope jeugprinsepaar 2020 komme felicitere op de prinsereceptie van Karnavalsvereiniging De Louvermen. Dees receptie vundj plaats op zunjig 2 fibbrewarie 2020 vanaaf 11.11 oer in ’t gemeinsjapshoes aan ’t Kirkvonjere in Buchte.