Prins 2023 “Louverriek Buchte”

 

Ozze nuje prins is 23 jaor geleje gebóare in ´t ziekehoes van Heële. In zien derde laevesjaor is Marvin nao ’t Louverriek verhoes, wo hae zich metein gans thoes veulde. Hae woont bie zien mam in café De Bar in Buchte. Van dae café zeen zien mam Ingrid en hööre partner Paul Janssen, dae awt prins van ’t Louverriek is gewaes, de eigenaer. Ozze prins is dan ouch mit gróate regelmaat te vènje achter maer ouch veur ’t beffet.

Van het feit det ozze prins vastelaovesblood door zien óajere haet sjtruime zal nemes raar opkieke. Hae haet zelfs al ens móage oefene es prins van café De Bar.

 

Prins Marvin wirk al 2 jaor in Zitterd es beveiliger bie gevangenis De Geerhorst, naodet hae ieërs op get angere plaatse gewirk haet. Wujer is hae in opleiding om brandjwaerman te waere. Ongertössje is hae waal al fanatiek aan ‘t oefene bie de vriewillige brandjwaer Bor.

 

Es ozze prins neet bezig is mit ’t bewake van boeve of ’t blusse van brèndjes, haet hae ’ein ongeluiflik drök laeve. 

Zwa is hae lid van Stichting Bevordering Jongeren- en Verenigingsleven Westelijke Mijnstreek´. Deze club is in ´t Louverriek baeter bekend es ‘De Poete’. Dit clubke is ein voortvloeisel vanoet de tied dat zie es jungskes en maedjes bie Jong Nederland waore. Deze groep vrunj organisere versjillende activiteiten, wo-onger de inmiddels oet Buchte neet mieë weg te denke Zomercarnaval of ’t sjlagerfest mit de vastelaovend. Prins Marvin is nog ummer enne Jong-Nederlander maer noe dan es leider van De Koetnaaze.

Wujer is ozze prins lid van Sjötterie St. Joseph. Marvin is in de achterste riej te vènje bie de gewaerdraegers.

Ouch is ozze prins bès sportief. Bie ’t derde team van HBC ’09 vervölt hae de zeer belangrieke taak van grensrechter. Al zal de voetbalclub ’t kommende sezoen ’t beste kenne investere in doellientechnologie. D’r wurd zelfs al gefluusterd dat de VAR zien intraeje deit op de velje in Buchte omdet Marvin ’t de kommende tied te drök haet es prins van ’t Louverriek!