Jeugdrins Daan I regeert euver ‘t Louverriek in 2023

Jeugdprins Daan I is enne zoon van Johan en Chantalle Brankaert en haet ein zösterke det loestert nao de naar Fenna. Same mit hun 2 knien en 2 kippe  wone ze op Kieërwaeg 93.

Dat veur Daan eine druim is oetgekomme maog waal dudelik zien. Zien ganse laeve sjteit al in ’t teike van ’t zeen van prins. Al haet hae d’r versjrikkelik langk op motte wachte want bie jedere kans die zich veur deeg veel hae boete de bóat. Zien pap en mam zeen destieds prins en prinses gewaes op hun basissjóal. In de femilie van mam hööre kantj wurd Daan de 28ste hóagheid!

 

Daan zit in groep 8 van basissjóal ‘Het Avontuur’ bie meister Evan. Zien lievelingsvak is handvaardigheid, ’t minst leuke vunj hae begriepend laeze. Op sjóal is hae dit jaor veurlaeskampioen gewore en maog ‘Het Avontuur’ gaon vertegenwoordige bie de veurlaeswedstried in Zitterd-Gelaen.

Es Daan later gróat is, wilt hae achtbanen gaon ontwerpe en dan ouch nog ’t leefste veur De Efteling, want dat is zien lievelingspark.

 

Jeugdprins Daan haet versjillende hobby’s. Ein van die hobby’s is keepen bie JO 12 van HBC’09. Mede dankzij hööm sjpeelt zien team in de 1e klasse van de KNVB. Om nog enne baetere keeper te waere traint hae op zunjigmörge bie de keeperssjóal van Mathieu Féron.

Ouch is hae lid van sjötterie St. Joseph Buchte. Van klein menke af aan leep hae al te marcheren door de tuin. Hae löp ongertössje al mìt bie de drumband van de sjötterie. Ieërs mit ein vlag en later mit ziene lyra.

Wujer is hae lid van Jong Nederland. Hae is bie De Koetnaaze, wovan de gróate prins van KV De Louvermen Marvin I ein van zien leiders is.

Sjpele mit zien vrunj en vrindinne deit ozze jeugdprins ouch gaer. Dan maak ’t neet oet of dat thoes, op sjóal of via enne game is. Ze höbbe altied de gróatste lol ongerein.