Jeugdprins Yves I & Jeugdprinses Merel regere euver ‘t Louverriek in 2024

Foto door: Action-foto Born

Jeugprins Yves 1 en Jeugprinses Merel regere euver ‘t Louverriek in 2024!

Dit jaor waor ‘t ummer gezellige Jeugspektakel van Jong Nederland op zaoterdigmiddig 13 jannewari. Volges traditie waere op dees activiteit de jeugdige hóaghede van De Louvermen oetgerope. Dit sezoen is dees ieër veur Yves Rooding en Merel Wirtz. Zie zulle komend vastelaovessezoen gaon regere euver alle jonge “Louvermenkes en Louverwiefkes” es Jeugprins Yves I en Jeugprinses Merel.

Jeugprins Yves I is enne zoon van Mark en Pascalle Rooding, ’t gróate prinsepaar van KV De Louvermen. Hae haet ein zösterke det loestert nao de naam Izzy. Same wone ze op Kieërwaeg 52.

Dat veur Yves eine druim is oetgekomme maog waal dudelik zien. Zien ganse laeve sjteit al in ’t teike van ’t zeen van prins. Dat bliek waal want hae is in 2018 al ens kleuterprins gewaes. Zien mam is in 2001 ouch al jeugprinses gewaes van ’t Louverriek en zien awwers zeen dus noe ’t gróate prinsenpaar.

Yves zit in groep 8 van basissjóal ‘Het Avontuur’ . Yves voetbalt zelf bie de JO13 van vv Bor en dao zorg hae veur de goals es spits. Wujer is hae lid van Jong Nederland Buchte. Es hae gein hoeswerk hoof te make spjeelt hae gaer op de playstation FIFA. Ouch is hae nog eine  trouwe fan van Fortuna Zitterd wo hae same mit ziene pap ummer nao geit kieke.

Jeugprinses Merel is ein dochter van Frank Wirtz en Monique Nab. Merel woont mit höör mam Monique, enne knien en ein kat op de Pastóar Jacobsstraot 8.

Veur Merel geldj eigenlijk hetzelfde es veur Yves. Zie haet namelik ouch altied de druim gehad om óajt ens jeugprinses te maoge zeen. Merel zit in groep 7 van basissjóal ‘Het Avontuur’. Op sjóal is ze oetgekóaze om mit te sjpele in een WDO film dae dit joar in de bioscoop zal versjiene. Merel haet versjillende hobby’s. Ze is namelik zeer creatief en teikent en knutselt vööl. Ouch sjpeelt zie sinds kort saxofoon. Wujer geit zie elke vriedig mit vööl plezeer nao Jong Nederland Buchte. Es Merel nao alle bezighede nog ein bitje tied euver haet, kik zie gaer films of loestert nao meziek.

 

Jeugprins Yves I en jeugprinses Merel kènt geer same mit Prins Mark I en Prinses Pascalle komme felicitere op de prinsereceptie van Karnavalsvereiniging De Louvermen. De receptie vundj plaats op zunjig 21 jannewarie 2024 vanaaf 11.11 oer in ’t gemeinsjapshoes aan ’t Kirkvonjere in Buchte.