Proclamatie

Prins Tim I & Prinses Inge

Proclamatie veur de vastelaovend in ‘t jaor 2020

Bie de grasie van de Wieze Raod, gebóare es rasechte Louverman, getrouwd mit ’n Ketje oet Houtem, höbbe veer, Tim & Inge Meekels, de ieër om in ’t jaor 2020 mit de vastelaovend te móage regere euver ’t Louverriek Buchte. Veer belóave bie deze plechtig alles te doon, wat van ein Prinsepaar maog waere verwach en proclamere in ’t biezeen van uch allemaol, es Prins Tim I en Prinses Inge van ’t Louverriek Buchte, de volgende puntje:

Ten eërste: Veer twee zeen ontzettend gruëtsj dat veer dit jaor Prins en Prinses maoge zeen van ’t Louverriek en deil maoge oetmake van de wieze Raod van De Louvermen.

Ten tweëde: Veer ôs excuses wille aanbeeje aan mien pap en mam, Pieter en José en aan ôs vrunj, want die wiste d’r natuur-lik niks van dat veer prinsepaar in ’t Louverriek zouwe waere. Auch alvas excuses aan ôs bure en de res van de sjtraot veur de euverlas dae zie gaon kriege de kómmende waeke.

Ten derde: Ich es Louverman, same mit mien Ketje, bin blieve hange in Buchte, wo veer same ein hoes hubbe gekoch in ’t centrum van ‘t Louverriek. Veur mien wirk môt ich jedere daag nao Kirchroa rieje, nao Boston Scientific, wo ’t mit de carna-valsdaag get minder good zal draeje, aangezeen ich noe hie in ‘t Louverriek mit de scepter moog zwaeje.

Ten veerde: Det mien prinses Inge, es gebaore Ketje, kump oet ein ech vastelaoves nès wao al vööl prinse en prinsesse oet zeen gekomme. Hööre opa, dae mede oprichter waor van de Katers, höör pap en mam die in 2014 euver ’t Katerriek geregeert hubbe en noe moog veer same euver ’t Louverriek regere.

Ten viefde: Es sjlaagwirker van Fanfare St. Jozef mot ich tot en mit 1 fibbrewarie nog aeve de focus hawte op os concours sjtukke aangezien veer den mit de drumband nao de Nederlandse Kampioensjappe gaon in Assen. Daonao zal ut muzikale programma meteen aangepas waere nao carnavals muziek, zodet auch zie klaor zeen veur de Vastelaovend in Buchte.

Ten zösde: Det veer es Leider en verzörgster van ‘t 1e en 2de team van HBC’09 laote weite det veer de kommende tied èn-s eine wedstrijd motte euversjlaon. De pienkes mot g’r uch maer wegdrènke mit dees daag want de zörg wurt noe aan ’t Lou-vermenkes en Louverwiefkes besjteed.

Ten zevende: Det ’t ôs super sjiek zou lieke es ôs femilies, sjus zo wie 19 jaor geleeje bie Prins Thei IV en Prinses Lea, mit zouwe gaon in de gróate optoch van ’t Louverriek op vastelaovesmaonjig. Veer zulle d’r den veur zörge det ze ein ieëre- plaats kriege tössje CV De Waeg Kwiet en ozze prinsewage.

Ten achste: Veer kieke oet nao de volgende Sjlagerfest in Café de Bar dae ‘t veurig jaor door ozze Raod van Ellef is gewonne. Veer wille auch de selectie van HBC’09 oetdage om deil te numme mit hun eige nummer. Auch noe houpe veer weer op leu-ke nummers die de ganse vastelaovend te heure zeen in ós Louverriek.

Ten neugende: Det veer CV De Waeg Kwiet de prinselikke titel wille toekènne. Dit beteikent waal det veer van hun verwachte bie zwa vööl meugelik activiteite in ’t Louverriek aanwezig te zeen. Mien prinses en ich verwachte in dat kader van hun dan ouch ein sjprankelend optraeje op vastelaovesdeensdig bie Buchte haet talent.

Ten teënde: Det ich jederein oproop om nao de prinsereceptie te komme op zunjig 2 fibbrewarie vanaaf 11.11 oer. Allereërs omdet veer ’t zellef heël sjiek venje es geer allemaol zouwt komme. Uiteraard ouch veur ’t nuje Jeugprinsepaar det volgende waek nog wurd oetgerope en veur de Raod van ellef.

Ten ellefde: Vastelaovend is ’n fieës van os allemaol, jonk & oud, krank & gezondj. Veer wille den auch same meziek make, same ein polonaise loupe, en sjpringe in ut rondj.Same sjpas hubbe, plezeer make en eine geweldige vastelaovend belaeve. Same get frisj, ein wienke of ein pilske drinke en zo noe en dan eine weggaeve. Veer houpe den auch det opnuuj jederein bie de vastelaovesactiviteite in ‘t Louverriek aanwezig is. Van ’t Jeugprinsepaar oetroope tot en mit ‘t pop verbrenne, geine maog waere gemis. Ein aantal maonje lank mooste veer wachte en tèlde veer nao dit sjpannende moment aaf, Noe kinne veer same mit uch Vastelaovend gaon viere in ‘t Louverriek,

Louvermenkes & Louverwiefkes, Alaaf, Alaaf, Alaaf!!!

Aldus opgemaak te Buchte, de 18e jannewarie 2020

Prins Tim I, Prinses Inge, Vorst Jeroen en de Wieze Raod

Jeugprins Jim I & Jeugdprinses Delana

Proclamatie Jeugprinsepaar van ’t Louverriêk 2020

Same:
Bèste Louvermenkes & Louverwiêfkes,
Biê de grasie van de Wiêze Raod, höbbe weer es nuut Jeugprinsepaar, de eër òm in ´t jaor 2020 mit de vastelaovend te maoge regere euver ’t sjóane Louverriêk Buchte. W’r wille òs aeve veursjtèlle:

Prins:
Ich heit Jim Geurts en zal regere es Jeugprins Jim de 1ste. Mien pap en mam zeen John en Jennifer en mien zusje hèt Jody. Mien pap en mam waore in 2009 ’t gróate Prinsepaar van de Katers oet Houtem en noe kenne ze ‘t van kortbie mitmake wie ’t hie in Buchte geit.

Prinses:
Ich heit Delana Maas en zal regere es Jeugprinses Delana. Mien pap en mam zeen Danny en Jacqueline. Miene pap is mich veurgegange es Jeugprins van de Vraatsjelaere oet Sjtadbrook en haup dat ich het net zwa good doon es hem.

Same:
Weer zulle dit jaor same mit Prins Tim I en Prinses Inge d’r veur zörge dat het eine hartsjtikke sjieke en te gekke vastelaovend wurt in ’t Louverriêk Buchte.

 

Bie deze proclamere weer de volgende puntje:

Prins: 
Ten eërste:  Dat weer ozze veurgangers Jeugprins Mart de 1ste en Jeugprinses Amy wille bedanke veur de fantastische meneer wö-op zie veurig jaor veurop zeen gegange in de Buchtense vastelaovend. Gaef ze ein daverend applaus!

Prinses:
Ten tweëde:  Weer venje het zwao tof dat ozze druim is oetgekomme, dat weer zeen oetgekaoze om in ’t jaor 2020 es Jeugprinsepaar te maoge regere euver ’t Louverriêk Buchte.

Prins:
Ten derde:  Ondanks dat weer beide op “OBS de Wissel” in Bor zitte zulle weer natuurlik same mit “BS Het Avontuur” in Buchte eine geweldige Sjóalcarnaval gaon viere!

Prinses:
Ten veerde:  Ich haup dat mien dansgroep van Danssjóal Femfit volgende waek zunjig op ozze Prinsereceptie ein knallend optraeje komme gaeve, ich kiek hie ech nao oet!

Prins:
Ten viefde:  Deze vastelaovend ken ich mich oetraoze es Jeugprins en dr’nao melj ich mich bie de rugbyclub aan om dao mien energie kwiet te rake.

Prinses:
Ten zösde:  Leve pap, zet dit vastelaovesseizoen de frittekaetels mer op standje max want sommige men van de raod van ellef kieke noe al sjael van de honger.

Prins:
Ten zevende:  Bie deze roop ich alle kènjer van ’t Louverriêk op om same mit os op dinsdig 25 fibbrewarie mit te doon aan “Buchte heat talent”, maoge de beste wenne!

Prinses:
Ten achste:  Aangezeen dat mien auwers dit jaor de vastelaovend in Buchte viere daag ich hun oet om mit te laupe in ozze optoch op vastelaoves maonjig.

Prins:
Ten neugende:  Om mien adjudanten dit seizoen te verwenne zal miene pap zien geweldige kaokkunste etalere veur hun, nao het pyamabal op vastelaoves deensdig zeen die 4 men bie os welkom om sjpek mit ei te aete.

Prinses:
Ten teënde:   Dat jedereen, jong en auwt, sjpas en plezeer haet mit de kommende vastelaovesdaag en dat ze same mit os d’r ein super sjiek faes van zulle make!

Same:
Ten ellefde: 
Vanaaf os kleuterjaore viere weer vastelaovend, mer dit jaor mit vaere en ein kreunke op de kop. Kènjer oet ’t Louverriêk kom same mit os danse en sjprènge, dan wurt ’t dit jaor in Buchte weer 3 daag top!

Alaaf, Alaaf, Alaaf.

Buchte, 24 jannewarie 2020
Jeugprins Jim I & Jeugprinses Delana