Bie de grasie van de Wieze Raod, gebóare en getóage in Buchte, krieg ich, Mike van Daal de ieër om in ’t jaor 2026 mit de vastelaovend te móage regere euver ’t Louverriêk Buchte. Same mit mien Prinses Jaimy belóave veer bie deze plechtig alles te doon, wat van ein Prinsepaar maog waere verwach en proclameer in ’t biezeen van uch allemaol, es Prins Mike I en Prinses Jaimy van ’t Louverriêk Buchte, de volgende puntje:

 

Det ich langs deze waeg Prins Marco I wil bedanke veur de meneer wo-op hae zich ‘t aafgeloupe jaor haet ingezat veur de vastelaovend in ’t Louverriêk. Vanaaf noe nump hae zien vertroewde plaats weer in bie de Raod van ellef en zal hae zien beste beinke veur zètte zwa det ’t de nuje jeugprinses aan niks zal ontbraeke.

 

Det veer in ’t jaor det De Poete 1×11 jaor besjtaon prinsepaar maoge zeen. Dit geit zeker ein gouwe rendje gaeve aan ‘t jubileum. Veer vraoge waal aan hun om bie jedere vastelaovesactiviteit in ’t Louverriek aanwezig te zeen om same mit oos enne onvergaetelikke vastelaovend te gaon belaeve!

 

Det veer es Jong-Nederlanders de ieër höbbe om prins en prinses te zeen in ’t Louverriek. Veer daodoor minder actief aanwezig kenne zeen op de ummer gezellige clubaovenden. Daorom zulle veer jedere groep trakteren op ein lekkere vastelaovesversjnapering wo-op ze de ganse vastelaovend kenne renne en raoze!

 

Det ich mit wirkzaamheje bie Newtone advies en accountancy mit de vasteloavesdaag in de wach zèt. Mit die daag wil ich mich namelik gans op mien prinssjap kenne richte, al zal ich ’t neet naolaote om De Louvermen gevraog en veural ongevraog van advies te veurzeen!

 

Det ’t mien leeve prinses en mich errug sjiek like es oos femilies mit gaon in de gróate optoch op vastelaovesmaonjig. Veer zulle d’r dan veur zörge dat es ze mitgaon, ze ein ieëreplaats kriege veur ozze prinsewage. Zwa kenne veer same mit jederein dae oos leef is genete van deze geweldige daag!

 

Det mien prinses enne gróate supporter is van Fortuna Sittard en ze wirkelik genne eine thoeswedstried euversjleit. De druim van höör is dan ouch om gekleid es prinses same mit mich, hööre prins, en de jonges van de wieze raod enne wedstried te bezeuke!

 

Det ich mien waardering oetspraek richting de Buchter Revue. Want ich weit es sjpeler en sjriever wie vööl wèrk d’r jeder jaor veur en achter de sjerme wurd verzat. Daorom  zal ich dit jaor geweun mitspele in de revue en zal d’r persëunlik  veur zörge det dees editie ein keuninklik tintje krig!

 

Omdet miene leeve dit jaor prinses is, zulle de vrouwluuj van handjbal vereiniging Bor höör get dèkker gaon misse op de training. Omdet te compenseren zal deze enthousiaste groep urges in oos sezoen getrakteerd waere op ein prinsesselikke verrassing!

 

Det ich es dragende krach bie de gewaerdraegers van sjötterie Sint Joseph blie ben det veer de kommende waeke neet hove te oefene en det ’t sjöttesezoen nog ff op zich leut wachte. Door miene drökke prinselikke agenda hej ich dao namelik toch geine tied veur gehad. Vanaaf ’t begin van het nuje sjöttesezoen belóaf ich weer in de pas te gaon loupe!

 

Det ich alle Louvermenkes en Louverwiefkes oproop om veural te blieve komme nao al die sjóan vastelaovesaktiviteite in Buchte. D’r is namelik in ozze vastelaovesagenda veur jederein get wils. Ozze wunsj is es prinsepaar om mit jederein van en in ’t Louverriêk eine onvergaetelikke vastelaovend te viere!

 

Mit uch allemaol wille veer vastelaovend viere, handj in handj,

Alle Louvermenkes en -wiefkes trèkke door os sjóane Louverlandj.

Vastelaovend, ’t fieës veur jongk en awt, gróat en klein,

doot allemaol mit, maak sjpas en plezeer, mit jederein.

Ich houp den ouch det jederein bie de vastelaovesactiviteite in ’t Louverriêk is,

vanaaf vandaag tot en met ’t popverbrènne, maog nemes waere gemis.

Vastelaovend is weer dao, de kop is d’r vanaaf,

Niks hilt os noe nog taege,

 

Louvermen, Alaaf, Alaaf, Alaaf.

 

Aldus opgemaak te Buchte, de 10e Jannewarie 2026

Prins Mike I, Prinses Jaimy, Vorst Jeroen en de Wieze Raod

Bèste Louvermenkes & Louverwiefkes, 

Biê de grasie van de Wiêze Raod, höb ich es nuuj Jeugprinses de ieër òm in ´t jaor 2026 mit de vastelaovend te móage regere euver ’t sjóane Louverriêk Buchte. Ich wil mich aevekes veursjtèlle: 

 

Ich heit Renée Offermans en zal regere es Jeugprinses Renée. Mien pap en mam zeen Roger en Anouschka en mien broor is de awt jeugprins van veurig jaor Ruben. En ich woon op de Wieënbroek.

 

 

Ten eërste: Det ich mien veurgangers Jeugprins Ruben de 1ste en Jeugprinses Fenna wil bedanke veur de geweldige meneer wo-op zie veurig jaor veurop zeen gegange in de Buchtense vastelaovend. 

 

Ten tweëde: Ich het super sjiek vènj det miene druim is oetgekomme, det ich bèn oetgekóaze om es opvolger van mien broor Ruben in ’t jaor 2026 es Jeugprinses te móage regere euver ’t Louverriêk Buchte. 

 

Ten derde: Det ich al mien ervaring die ich in 2019 es prinses höb opgedaon bie kenjeropvang Allerleefste noe zal gaon gebroeke om d’r eine super sjieke vastelaovend van te make in ’t Louverriêk.

 

Ten veerde: Ich vanoef noe tot essjelegoonsdig allein nog maer verkleid en geschmink gaon paerdrieje bie de manege Op de Berg in Pey.

 

Ten viefde: Ich ’t leuk zou vènje es mien vriendinne van de manege op de Berg in Pey same met mich vastelaovend komme viere in ‘t Louverriêk

 

Ten zesde: Ich de kommende periode minder tied höb veur mien favoriete hobby: SHOPPEN! Maer mam, dit gaon veer nao de vastelaovend zeker inhaole!

 

Ten zevende: Danse is ouch ein van mien hobby’s en vènj ich gans top! Dus jedereen, jong en awt, mot sjpringe, zènge en danse deze vastelaovend en ich gaon  veurop!

  

Ten achste: Det ich het super sjiek zou vènje es mien pap, mam, broor en de res van oos femilie op vastelaovesmaonjig mit geit in de optoch!

 

Ten neugende: Det pap dit jaor blie mit mich is det der mich neet hoof te schminke, maer ouch det gaon veer volgend jaor zeker inhaole!

Ten teënde: Omdet ich mit dees daag vööl energie verbroek verwach ich dat mam veur jedere activiteit eine biefstjök met champignonroomsaus veur mich maak. Omdet det mien lievelingsgerecht is.

 

 

Alaaf, Alaaf, Alaaf. 

Buchte, 10 jannewari 2026

Jeugprinses Renée