Proclamatie veur de vastelaovend in ‘t jaor 2025

Bie de grasie van de Wieze Raod, gebóare en getóage in Buchte, krieg ich, Marco Jacobs de ieër om in ’t jaor 2025 mit de vastelaovend te móage regere euver ’t Louverriêk Buchte. Ich belóaf bie deze plechtig alles te doon, wat van enne Prins maog waere verwach en proclameer in ’t biezeen van uch allemaol, es Prins Marco I van ’t Louverriêk Buchte, de volgende puntje:

Ten eërste:
Det ich langs deze waeg ’t veurige prinsepaar Mark en Pascalle wil bedanke veur de meneer wo-op zie zich ‘t aafgeloupe jaor höbbe ingezat veur de vastelaovend in ’t Louverriêk. Zie höbbe bie vööl Louvermenkes en -wiefkes te vastelaoveshart sjneller laote sjlaon. Op dae ingesjlage waeg gaon ich wujer!

Ten tweëde:
Det ich mit onmiddellijke ingangk ein nuuj sóart verlof aankondig veur ’t bedrief van miene pap en mich, Jacobs Bouw & Advies: vastelaovesverlet! Aangezeen ich noe prins ben en miene pap jubilaris, zulle veer royaal gebroek make van dees verlofregeling onger ’t genot van ein lekkere nottevot en ein glaeske beer!

Ten derde:
Omdat ich dit jaor gróate prins ben, ken ich neet actief deilnumme aan de jeugprinsecommissie van De Louvermen en mitwirke aan ‘t ongersjteune van os jeugprinsepaar. Middels dees proclamatie wil ich ‘t vertroewe oetspraeke in mien kompanen Han en Wil. Zie zulle dit jaor weer hun beste beinke veurzètte zwa det ’t nuje jeugprinsepaar ’t aan niks zal ontbraeke!

Ten veerde:
Det ich ongeluifelik gruëtsj ben op miene pap Guus, dae oetgeraekend in mien prinsejaor zien 4×11 jaorig jubileum viert bie KV De Louvermen. Ich roop jederein op om hööm op ozze prinsereceptie te komme feliciteren mit deze, ouch veur os vereiniging, unieke mijlpaol!

Ten viefde:
Det ich ’t sjiek venj det De Poete volgende waek ‚t ALVK gaon organisere. D’r zal enne keihèlle strijd gaon plaatsvenje hie in ’t gemeinsjapshoes om de felbegeerde Jean Luc Groenteman bokaal. Ich zal uiteraard mien sjteinke biedrage om dit evenement te laote sjlage door hie en dao get sjtreu neer te góaje!

Ten zösde:
Dit sezoen besjteit de Keuninklikke Sjöttekapel 4 x 11 jaor. Ich roop jederein op om vastelaovesdeensdig nao hun traditionele pyjamabal in Café De Bar te komme. Dao zulle ze laote heure worom dees kapel in ’t Louverriêk enne Keuninklikke titel maog drage!

Ten zevende:
Det ich mien ganse femilie en vrunj oproop om mit te gaon in de gróate optoch op vastelaovesmaonjig. Ich houp det ze dit veur mich es prins wille doon, maer zeker ouch veur miene pap in verbandj mit zien 4×11 jaorig jubileum!

Ten achste:
Det ‘t De Louvermen haet behaag om emes oet hun eige geledere Prins te make. Omdat d’r mit die daag vööl werk mot waere verzat, ben ich hieël blie det veer maer leefs 2 nuje awt prinse kenne toevoege aan de wieze raod. Ich heit miene veurgenger auwt prins Mark van harte welkom bie oos sjóan vereiniging. Ouch Giovanni l’Espoir wil ich welkom heite. Hae waor in 2023 prins van de Sjoutvotte maer woont ongertössje in ’t Louverriêk. Ich wunsj hun allebei vööl succes en plezeer!

Ten neugende:
Det ich ’t noe al enne gesjlaagde aovend venj wo-in Jong Nederland en KV De Louvermen de hanj inein höbbe gesjlage door ‘t oetrope van ’t jeugprinsepaar en mich es gróate prins te combinere. Ich houp det dees gouwe formule jaore gebroek kent waere en dat gans Buchte deze aovend blif bezeuke!

Ten tieënde:
Det ich alle Louvermenkes en Louverwiefkes oproop om veural te blieve komme nao al die sjóan vastelaovesaktiviteite in Buchte. D’r is namelik in ozze vastelaovesagenda veur jederein get wils. Miene wunsj is es prins om mit jederein van en in ’t Louverriêk eine onvergaetelikke vastelaovend te viere!

Ten ellefde:
Mit uch allemaol wil ich vastelaovend viere, handj in handj,
Alle Louvermenkes en -wiefkes trèkke door os sjóane Louverlandj.
Vastelaovend, ’t fieës veur jongk en awt, gróat en klein,
doot allemaol mit, maak sjpas en plezeer, mit jederein.
Ich houp den ouch det jederein bie de vastelaovesactiviteite in ’t Louverriêk is,
vanaaf vandaag tot en met ’t popverbrènne, nemes maog waere gemis.
Vastelaovend is weer dao, de kop is d’r vanaaf,
Niks hilt mich noe nog taege,

Louvermen, Alaaf, Alaaf, Alaaf.

Aldus opgemaak te Buchte, de 25e jannewarie 2025
Prins Marco I, Vorst Jeroen en de Wieze Raod

Proclamatie Jeugprins van ’t Louverriêk 2025

Bèste Louvermenkes & Louverwiêfkes,

Biê de grasie van de Wiêze Raod, höbbe weer es nuujt Jeugprinsepaar, de ieër òm in ´t jaor 2025 mit de vastelaovend te maoge regere euver ’t sjóane Louverriêk Buchte. W’r wille òs aeve veursjtèlle:

Jeugprins: Ich heit Ruben Offermans en zal regere es Jeugprins Ruben de 1ste. Mien pap en mam zeen Roger en Anouschka en mien zuske is Renée. En ich woon op de Wieënbroek.

Jeugprinses: Ich heit Fenna Brankaerts en zal regere es Jeugprinses Fenna. Mien pap en mam zeen Johan en Chantalle en mien broor is auwt jeugprins Daan. En ich woon op de Kieërwaeg.

Bie deze proclameer weer de volgende puntje:

Ten eërste, Jeugprins:
dat weer ozze veurgengers Jeugprins Yves de 1ste en Jeugprinses Merel wille bedanke veur de geweldige meneer wo-op zie veurig jaor veurop zeen gegange in de Buchtense vastelaovend.

Ten tweëde, Jeugprinses:
weer venje het super sjiek dat ozze druim is oetgekomme, dèt weer zeen oetgekóaze om in ’t jaor 2025 es Jeugprinsepaar te maoge regere euver ’t Louverriêk Buchte. En ich vanaaf noe allein nog maer plat gaon kalle.

Ten derde, Jeugprins:
Ich al mien ervaring die ich es kleuterprins höb opgedaon in 2019 noe zal gaon gebroeke om der ein fantastische vastelaovend van te make in ’t Louverriêk.

Ten veerde, Jeugprinses:
Ich ’t leuk zou vènje es miene groep de Babbelaere van Jong Nederland same mit os vastelaovend kump viere in ’t Louverriêk.

Ten viefde, Jeugprins:
Ich mien vösjhengels dees periode effe laot sjtoan om mit de vastelaovend veurop te gaon.

Ten zesde, Jeugprinses:
Veer dees periode bie de muziekclub NTO allein mer vastelaovesleedjes gaon sjpele.

Ten zevende, Jeugprins:
Ich de kommende waeke get minder tied höb om same mit miene pap nao Fortuna te gaon kieke.

Ten achste, Jeugprinses:
De pony’s bie de manege zulle mich vanwege de vastelaovend get mieë motte misse. Daorom zѐt ich de paerdriesjtevele noe effe aan de kantj want ich gaon veurop in ’t louverlandj!

Ten neugende, Jeugprins:
dat ze bie JO12-1 van HBC’09/VV Born combinatie d’r raekening mit motte houwte dat ich de kommende periode get minder fit aan de aaftrap versjien.

Ten teënde, Jeugprinses:
Same mit mien femilie vastelaovend viere zit mich in het blood, dus daag ich hun oet om mit te loupe in ozze optoch op vastelaovesmaonjig.

Ten ellefde:
Jeugprins en Jeugprinses bis se maar eine kieër in dien laeve dus gaon veer deze vastelaovend alles gaeve!

Alaaf, Alaaf, Alaaf!

Aldus opgemaak te Buchte, de 25e Jannewarie 2025
Jeugprins Ruben I en Jeugprinses Fenna, Vorst Jeroen en de Wieze Raod